ورلڈ چیمپیئن شپ آف لیجنڈز: انڈیا کا کھیلنے سے انکار، پاکستان فائنل میں

ورلڈ چیمپیئن شپ آف لیجنڈز نے بدھ کو جاری ایک بیان میں تصدیق کی ہے کہ انڈیا چیمپیئنز اور پاکستان چیمپیئنز کے درمیان ہونے والا کرکٹ میچ انڈیا کی دستبرداری کے باعث منسوخ کر دیا گیا ہے جس کے نتیجے میں پاکستان چیمپیئنز اب براہ راست فائنل میں پہنچ گئی ہے۔

پاکستان چیمپیئنر اور انڈیا چیمپیئنز کی ٹیموں کے درمیان جمعرات کو برمنگھم میں سیمی فائنل میچ کھیلا جانا تھا۔

ورلڈ چیمپیئن شپ آف لیجنڈز (ڈبلیو سی ایل) نے اپنے انسٹاگرام اکاؤنٹ پر جاری بیان میں کہا کہ ’ہم نے ہمیشہ کھیلوں کی طاقت پر یقین کیا ہے۔۔۔تاہم، عوامی جذبات کا ہمیشہ احترام کیا جانا چاہیے۔‘

بیان میں خاص طور پر انڈیا کی دستبرداری کا ذکر کرتے ہوئے کہا گیا کہ ’ہم انڈیا چیمپیئنز کے سیمی فائنل سے دستبرداری کے فیصلے کا احترام کرتے ہیں اور ہم پاکستان چیمپیئنز کی مقابلہ کرنے کی تیاری کا بھی یکساں احترام کرتے ہیں۔‘

ٹورنامنٹ کے سپانسرز میں سے ایک ’ایزی مائی ٹرپ‘ نے پہلے ہی انڈیا اور پاکستان کے سیمی فائنل سے علیحدہ ہونے کا اعلان کر دیا تھا۔

اس سے قبل بھی برطانیہ میں ہونے والے اس ٹورنامنٹ کے گروپ میچ میں انڈیا چیمپیئنز نے پاکستان کے ساتھ کھیلنے سے انکار کر دیا تھا۔

پاکستان اور انڈیا کے درمیان مئی میں ہوئی جنگ کے بعد سے دونوں ممالک کے درمیان تناؤ کی صورت حال ہے۔

ڈبلیو سی ایل کا کہنا ہے کہ ’انڈیا چیمپیئنز اور پاکستان چیمپیئنز کے درمیان میچ منسوخ کر دیا گیا ہے۔‘

اس کے نتیجے میں پاکستان چیمپیئنز اب فائنل میں اپنی جگہ بنا چکی ہے۔

ایونٹ کا دوسرا سیمی فائنل آسٹریلیا اور جنوبی افریقہ کے درمیان جمعرات کو برمنگھم میں ہی کھیلا جائے گا۔