|
ایران کے خلاف امریکہ اور اسرائیل کی جنگ جاری ہے۔ امریکہ نے اسے ’آپریشن ایپک فیوری‘ جبکہ ایران نے جوابی کارروائی کو ’وعدہ صادق 4‘ کا نام دیا ہے۔ امریکی صدر کی ایران کو مہلت آج ختم ہو رہی ہے۔ |
صبح نو بج کر 10 منٹ
پاکستان میں ڈیزل کے ذخائر 25 دن کے لیے کافی: حکام
وزیر خزانہ محمد اورنگزیب کی زیر صدارت پیر کو پیٹرول کی قیمتوں کی نگرانی کے لیے قائم کابینہ کمیٹی کے اجلاس میں بتایا گیا کہ ملک میں ڈیزل کے ذخائر تقریباً 25 دن کی ضروریات پوری کرنے کے لیے کافی ہیں۔
اجلاس میں حالیہ قیمتوں میں ردوبدل کے بعد پیٹرولیم مصنوعات کی فراہمی اور مارکیٹ کی صورت حال کا تفصیلی جائزہ لیا گیا۔
اجلاس میں اس بات پر زور دیا گیا کہ سپلائی کا تسلسل برقرار رکھا جائے، مارکیٹ ڈسپلن کو یقینی بنایا جائے اور سپلائی چین میں نگرانی کے نظام کو مزید مضبوط بنایا جائے۔
آبنائے ہرمز میں جہاز رانی کے تحفظ پر اقوام متحدہ میں قرار داد پر ووٹنگ آج
اقوام متحدہ کی سلامتی کونسل میں منگل کو آبنائے ہرمز میں جہاز رانی کے تحفظ سے متعلق ایک قرارداد پر ووٹنگ ہو گی۔
اس قرارداد پر پیش رفت کئی مرتبہ موخر ہو چکی ہے کیوں کہ سلامتی کونسل کے مستقل اراکین روس اور چین کی طرف سے اس پر ویٹو کا خدشہ تھا۔
چار مارچ، 2026 کو پیرس میں میرین ٹریفک ویب سائٹ سے حاصل کی ہوئی اس تصویر میں آبنائے ہرمز میں تجارتی کشتیوں کی نقل و ظاہر ہو رہی ہے (اے ایف پی)
بحرین نے خلیج کے دیگر ممالک کی حمایت سے تقریباً دو ہفتے قبل اس قرارداد کے مسودے پر مذاکرات کا آغاز کیا تھا۔
28 فروری کو امریکہ اور اسرائیل کے ایران پر حملوں کے بعد تہران نے ردعمل میں آبنائے ہرمز کو عام آمد و رفت کے لیے بند کر دیا تھا۔روئٹرز
صبح سات بج کر 25 منٹ
اسرائیلی کے ایران پر نئے فضائی حملے
اسرائیل کی افواج نے کہا ہے کہ انھوں نے ایران پر فضائی حملوں کی ایک نئی ’لہر‘ کا آغاز کر دیا ہے، جب کہ اسرائیلی وزیر اعظم بینامن نتن یاہو نے دعویٰ کیا ہے کہ اسرائیل نے ایران کا سب سے بڑا پیٹروکیمیکل پلانٹ تباہ کر دیا۔
اسرائیلی وزیرِاعظم کے ایکس اکاؤنٹ پر جاری بیان ایک بیان میں کہا گیا کہ منظم انداز میں آئی آر جی سی (پاسداران انقلاب) کی مالی مشین کو ختم کیا جا رہا ہے۔
جمعے کو نتن یاہو نے کہا تھا کہ ایران پر حملوں سے اس کی سٹیل پیدوار کی صلاحیت کو 70 فیصد تک تباہ کیا جا چکا ہے، جس سے تہران کی ہتھیار بنانے کی صلاحیت کو نمایاں طور پر نقصان پہنچا ہے۔
صبح چھ بج کر 25 منٹ
سات بیلسٹک میزائل تباہ کر دیے: سعودی عرب
سعودی وزارت دفاع نے ایک بیان میں بتایا کہ اس کے دفاعی نظام نے ملک کے مشرقی حصے کی جانب داغے گئے سات بیلسٹک میزائلوں کو روک کر تباہ کر دیا، جن کا ملبہ بجلی کی تنصیبات کے قریب گرا۔