دوسرے ون ڈے انٹرنیشنل میں شکست کے بعد پاکستان کرکٹ ٹیم کے کپتان محمد رضوان نے پانچویں بولر کے معاملے پر کشمکش کا اعتراف کرتے ہوئے کہا کہ منگل کو سیریز کے فیصلہ کن میچ کے لیے ٹیم کا حتمی فیصلہ دیر سے کیا جائے گا۔
پہلا ون ڈے میچ پانچ وکٹ سے جیتنے والے پاکستان نے بارش سے متاثرہ دوسرے میچ میں مقررہ 37 اوورز میں سات وکٹ پر 171 رنز بنائے، لیکن ویسٹ انڈیز نے پانچ وکٹ سے کامیابی حاصل کرکے تین میچوں کی سیریز 1-1 سے برابر کر دی۔
اس سیکشن میں متعلقہ حوالہ پوائنٹس شامل ہیں (Related Nodes field)
پاکستان کے پارٹ ٹائم بولرز صائم ایوب اور سلمان آغا نے مجموعی طور پر سات اوورز میں بغیر وکٹ لیے 66 رنز دیے، جس سے ویسٹ انڈیز آسانی سے ہدف تک پہنچ گیا۔
میچ کے بعد رضوان نے کہا ’آپ کہہ سکتے ہیں کہ ہمارے پانچویں بولر نے بہت زیادہ رنز دیے، لیکن حالیہ برسوں میں سلمان آغا اور صائم ایوب دونوں نے ہمارے لیے اچھی بولنگ کی۔
’آج صائم کا دن اچھا نہیں تھا، لیکن انہوں نے ٹی ٹوئنٹی سیریز میں اچھی کارکردگی دکھائی۔ یہ کھیل کا حصہ ہے۔‘
رضوان کا کہنا تھا کہ وہ حالات کو سمجھ نہیں پائے اور بارش کے باعث کئی وقفے ان کے لیے نقصان دہ ثابت ہوئے۔
’سچ پوچھیں تو موسم کی پیشگوئی توقعات سے بالکل مختلف نکلی، اور حالات کا اندزہ لگانا مشکل ہو گیا۔ ہم تمام آپشنز کھلے رکھ رہے ہیں اور کنڈیشنز دیکھ کر ٹیم فائنل کریں گے۔‘
پاکستان اس سے قبل ٹی ٹوئنٹی سیریز 2-1 سے جیت چکا تھا۔