(24 نیوز)سابق بنگلہ دیشی وزیراعظم شیخ حسینہ واجد کی بیٹی پر کرپشن کے الزامات سامنے آنے پر عالمی ادارے نے بڑا اقدام کرلیا۔
عالمی ادارۂ صحت (WHO) نے ایک غیر معمولی اقدام میں اپنی علاقائی ڈائریکٹر سائمہ واجد کو غیر معینہ مدت کے لیے چھٹی پر بھیج دیا ہے، سائمہ واجد، برطرف شدہ بنگلہ دیشی وزیر اعظم شیخ حسینہ کی بیٹی ہیں۔
ہیلتھ پالیسی واچ کی ایک رپورٹ کے مطابق ڈبلیو ایچ او کے ڈائریکٹر جنرل ڈاکٹر تیدروس ایڈہانوم نے 11 جولائی سے سائمہ واجد کی رخصتی کے بارے میں عملے کو ایک ای میل کے ذریعے آگاہ کیا۔
اس ای میل میں مزید کہا گیا کہ ڈاکٹر کیتھرینا بوہمے، جو ڈبلیو ایچ او کی اسسٹنٹ ڈائریکٹر جنرل ہیں، سائمہ واجد کی جگہ جنوب مشرقی ایشیا کے علاقائی دفتر (SEARO) میں عارضی طور پر ذمہ داریاں سنبھالیں گی۔
مزید پڑھیں:جوہری مذاکرات، ایران نے نئی شرائط رکھ دیں
رواں سال کے آغاز میں بنگلہ دیش کی اینٹی کرپشن کمیشن (ACC) نے سائمہ واجد کے خلاف ایک مقدمہ درج کیا تھا۔
اس مقدمے میں ان کے تعلیمی کوائف پر سوالات اٹھائے گئے تھے، جو انہوں نے ڈبلیو ایچ او کی اعلیٰ عہدے کے لیے پیش کیے تھے۔
بنگلادیشی اینٹی کرپشن کمیشن نے یہ بھی الزام عائد کیا کہ سائمہ نے اپنی والدہ شیخ حسینہ کے اثر و رسوخ کا استعمال کر کے ڈبلیو ایچ او میں علاقائی سربراہ کا عہدہ حاصل کیا۔
