(ویب ڈیسک )ترکی کے دارالحکومت انقرہ میں اپوزیشن جماعت کے مرکزی دفتر پر پولیس نے بڑا آپریشن کرتے ہوئے دھاوا بول دیا، جس کے دوران آنسو گیس کی شیلنگ اور شدید ہنگامہ آرائی دیکھنے میں آئی۔
غیر ملکی میڈیا کے مطابق ریپبلکن پیپلز پارٹی کے ہیڈکوارٹرز کے باہر پولیس کی بڑی نفری تعینات کی گئی، جہاں اہلکاروں اور کارکنوں کے درمیان کشیدگی بڑھتی گئی۔
دفتر کے اندر موجود کارکنوں نے مزاحمت کرتے ہوئے پولیس کو روکنے کی کوشش کی، بعض افراد نے رکاوٹیں قائم کیں اور مختلف اشیاء بھی استعمال کیں، تاہم سیکیورٹی فورسز نے دروازے توڑ کر عمارت کا کنٹرول حاصل کر لیا۔
یہ بھی پڑھیں:معروف ٹائیکون کے ایک ہی روز اربوں روپے ڈوب گئے
رپورٹس کے مطابق پولیس کی جانب سے آنسو گیس کی شیلنگ کے باعث دفتر کے اندر دھواں بھر گیا، جس سے متعدد افراد کو مشکلات کا سامنا کرنا پڑا۔
یہ کارروائی ایسے وقت میں ہوئی ہے جب عدالت نے پارٹی قیادت کے حوالے سے متنازع فیصلہ دیا تھا، جس کے بعد سیاسی کشیدگی میں مزید اضافہ ہو گیا ہے۔
اپوزیشن رہنما نے اس کارروائی کو سیاسی حملہ قرار دیتے ہوئے کہا ہے کہ ان کی جماعت دباؤ کا شکار ہے، جبکہ حکومت کی جانب سے موقف اختیار کیا گیا ہے کہ عدالتی فیصلے کے مطابق اقدامات کیے جا رہے ہیں۔
واقعے کے بعد انقرہ میں سیاسی صورتحال مزید کشیدہ ہو گئی ہے اور سیکیورٹی صورتحال پر نظر رکھی جا رہی ہے۔