نیویارک ۔ 9 جولائی (ایجنسیز) معروف ٹیکنالوجی کمپنی ایپل نے بھارتی نڑاد صبیح خان کو چیف آپریٹنگ آفیسر (COO) کے عہدے پر ترقی دے دی ہے۔ کمپنی نے آج اعلان کیا کہ صبیح خان رواں ماہ کے آخر تک جیف ولیمز کی جگہ یہ ذمہ داری سنبھالیں گے۔صبیح خان گزشتہ تین دہائیوں سے ایپل سے وابستہ ہیں اور 2019 میں انہیں سینئر نائب صدر آپریشنز کے طور پر ایگزیکٹو ٹیم میں شامل کیا گیا تھا۔ وہ اس وقت ایپل کی سپلائی چین اور مینوفیکچرنگ آپریشنز کے امور کی نگرانی کر رہے تھے۔صبیح خان نے جدید مینوفیکچرنگ ٹیکنالوجیز کے فروغ میں اہم کردار ادا کیا ہے، امریکہ میں ایپل کی پیداواری سرگرمیوں کو وسعت دی اور عالمی چیلنجز کے تناظر میں کمپنی کی لچکدار حکمت عملی میں مدد کی۔صبیح خان 1966 میں اترپردیش کے ضلع مرادآباد میں پیدا ہوئے۔ وہ پانچویں جماعت تک وہیں تعلیم حاصل کرنے کے بعد اپنے خاندان کے ہمراہ سنگاپور منتقل ہوگئے تھے۔ بعد ازاں انہوں نے امریکہ جا کر ٹفٹس یونیورسٹی سے اکنامکس اور مکینیکل انجینئرنگ میں بیچلرز، اور رینسلیر پولی ٹیکنک انسٹیٹیوٹ سے مکینیکل انجینئرنگ میں ماسٹرز کی ڈگری حاصل کی۔ایپل میں شمولیت سے قبل صبیح خان Plastics GE میں ایپلیکیشنز ڈیولپمنٹ انجینئر اور ٹیکنیکل لیڈر کے طور پر خدمات انجام دے چکے ہیں۔ وہ 1995 میں ایپل کے پروکیورمنٹ گروپ کا حصہ بنے تھے۔
